Utstillingsopning: Sørfjordmo & Messel

Onsdag 30. september opnar dørene til ei duoutstilling med to av Noregs mest etterspurde målarar, Øyvind Sørfjordmo og Ole Messel. Utstillinga blir vist i Galleri Hvelvet, og begge kunstnarane vil vere til stades på opningskvelden.

Grieg Kunstsamling gjorde sitt fyrste innkjøp av Øyvind Sørfjordmo (f. 1987 i Sarpsborg) i 2021, og har sidan følgt opp med fleire innkjøp. Dette er fyrste gongen han kjem til Hvelvet med nye verk som òg vil vere tilgjengelege for sal. Sørfjordmo arbeider med fargerike og formrike abstrakte måleri, som ofte ligg på grensa til det figurative eller representative.

Auga vert dregne hit og dit på lerreta til Sørfjordmo; den automatiske mønsterattkjenninga i hjernen vert tilført kraftfôr. Detaljar spring fram og gjev ei ane av attkjennelege former, berre for å vike plassen for eit anna element som gjev assosiasjonar til noko heilt anna. Det er leikent og rikt, heile tida nytt, i dialog med auget som ser og mennesket som opplever.

Som Duchamp sa: «…the creative act is not performed by the artist alone; the spectator brings the work in contact with the external world by deciphering and interpreting its inner qualifications and thus adds his contribution to the creative act. This becomes even more obvious when posterity gives its final verdict and sometimes rehabilitates forgotten artists.»

I bileta til Sørfjordmo vert orda til Duchamp ikkje berre ei filosofisk betrakting, men ein levande aktivitet.

Måleria til Ole Messel er inspirerte av natur og hans eigne repetitive prosessar. Dei får oss til å tenkje på den koloristiske ekspresjonismen til Per Kirkeby, men òg dei overdådige, sprakande skogsinteriøra til Gustav Klimt. Men den lyriske sensitiviteten er alltid til stades, noko som gjer at måleria til Messel aldri vert påtrengjande, men intime refleksjonar over ein opplevd natur.

Ole Messel (f. 1986 i Sarpsborg) bur og arbeider på Falster i Danmark. Han har ein bachelorgrad frå Kunstakademiet i Bergen frå 2013, men hadde si fyrste separatutstilling så seint som i 2024. Det var i galleriet til Katja van Etten Jarem og Sørfjordmo, Galleri Van Etten. På kort tid vart han kjøpt inn av fleire viktige samlingar, og er verkeleg ein kunstnar på rask veg opp.

Tilgjengeleg for sal 

Begge kunstnarane presenterer heilt nye verk, som også vil vere tilgjengelege for sal.

På opningsdagen

Øyvind Sørfjordmo og Ole Messel vil begge vere til stades under opninga, og saman med kurator Jørgen Larsson og styreleiar i Grieg Foundation, Elna-Kathrine Grieg, inviterer dei til ein kunstprat om utstillinga og arbeidet deira.

Same kveld opnar også haustens samlingsutstilling, som fyller det største visningsrommet vårt.

Vi byr på noko godt i glaset og ønskjer alle hjarteleg velkomne. Gratis inngang.

___

Etter opning vil duoutstillinga bli ståande fram til 1. november, med opningstider onsdag–søndag kl. 12:00–16:00. Billettar kr 50 for barn/student/honnør og kr 100 for vaksne.

Tusen takk til Grieg Foundation for eit godt og verdifullt samarbeid!